Terras do Ulla e Tambre é un territorio que se atopa no centro de Galicia, na esquina sudeste da provincia da Coruña. Está formado por 11 concellos: Arzúa, Boimorto, Boqueixón, Melide, O Pino, Santiso, Sobrado dos Monxes, Toques, Touro, Vedra e Vilasantar. É un espazo rural no que destacan as históricas vilas de Melide e Arzúa como principais núcleos urbanos.

O destino recibe o nome “Terras do Ulla e Tambre” na honra dos ríos que enmarcan o territorio e conectan os seus principais recursos turísticos: os Espazos Naturais Protexidos na Serra do Careón e nos ríos Ulla e Tambre, o turismo náutico e ocio activo nestes ríos e os seus afluentes e no encoro de Portodemouros, patrimonio histórico-cultural como o do camiño de Santiago ao seu paso pola lagoa de Sobrado, Furelos ou Ribadiso, e a gastronomía, pois na ribeira do Ulla prodúcese o viño D.O. Rías Baixas. Todo isto entrelázase cunha oferta diversa de recursos e servizos en todos os concellos para poder gozar da Galicia interior a un paso de Santiago de Compostela.